අයහපත් කාළගුණික තත්වය හමුවේ බස්නාහිර, දකුණු සහ සබරගමුව පළාත්වල ගංවතුරෙන් පීඩාවට පත් ජනතාවට සහන සැලසීම සඳහා අනුයුක්ත කෙරුණු නාවික හමුදා ආපදා සහන කණ්ඩායම් විසින්, එම ප්‍රදේශයේ ගංවතුරෙන් ආපදාවට පත් පුද්ගලයන් ආරක්ෂිතව මුදාගැනීම සහ ඔවුන්ගේ එදිනෙදා අවශ්‍යතා වෙනුවෙන් කුඩා යාත්‍රා මඟින් ආපදා සහන සැලසීමේ මෙහෙයුම් අඛණ්ඩව සිදු කරමින් පවති.

ශ්‍රී ලංකාවට දකුණු දෙසින් දෙවුන්දර තුඩුවේ සිට නාවික සැතපුම් 480 ක් පමණ (කිලෝ මීටර් 889 ක් පමණ) දුරින් වූ ගැඹුරු මුහුදේදී ආපදාවට පත්ව සිටියදී කොළඹ, සමුද්‍රීය සෙවීම් හා මුදවා ගැනීම් සම්බන්ධීකරණ මධ්‍යස්ථානයේ සම්බන්ධීකරණයෙන්, විදෙස් නෞකාවක් මඟින් මුදවා ගත් මෙරට බහුදින ධීවර යාත්‍රාවක සිටි ධීවරයින් හය දෙනා (06), අද දින උදෑසන (2024 ජුනි 02) ගාල්ල වරාය වෙත රැගෙන ඒමට නාවික හමුදාව විසින් කටයුතු කෙරිණි.

දිවයිනට බලපා ඇති අයහපත් කාළගුණික තත්වය හමුවේ පීඩාවට පත්වන ජනතාවට සහන සැලසීම සඳහා කළුතර දිස්ත්‍රික්කයේ බුලත්සිංහල, පුවක්පිටිය, පාලින්දනුවර හා වැලිපැන්න ගාල්ල දිස්ත්‍රික්කයේ තවලම, මාතර දිස්ත්‍රික්කයේ අකුරැස්ස හා පනාදුගම යන ප්‍රදේශ වෙත නාවික හමුදා ආපදා සහන කණ්ඩායම් ස්ථානගත කිරීමට ශ්‍රී ලංකා නාවික හමුදාව විසින් 2024 ජුනි මස 01 වන දින කටයුතු කෙරුණු අතර, මේ වන විට එම සහන කණ්ඩායම් ආපදා සහන මෙහෙයුම් සිදු කරමින් සිටියි.

ශ්‍රී ලංකා නාවික හමුදාව; යාපනය, කදෙයිකාඩු, චුන්ඩිකුලම්, කුඩාරප්පු සහ නගර්කෝවිල් ප්‍රදේශයන්ට ඔබ්බෙන්වූ මුහුදු ප්‍රදේශයන්හි 2024 මැයි මස 31 වන දින සිදුකල සෝදිසි මෙහෙයුම් මඟින් නීති විරෝධී ‍ලෙස විදුලි ආලෝක ධාරා භාවිතයෙන් ධීවර කටයුතු සිදුකළ සහ නීති විරෝධී ලෙස රාත්‍රී කාලයේ කිමිදුම් කටයුතු සිදුකල පුද්ගලයින් එකොළොස් දෙනෙකු (11) සමඟ ඩිංගි යාත්‍රා පහක් (05), මුහුදු කූඩැල්ලන් ගණනින් එක්දහස් එකසියයක (1100) පමණ තොගයක්, කිමිදුම් උපකරණ සහ නීති විරෝධී ධීවර ආම්පන්න නාවික හමුදා භාරයට ගැනීමට කටයුතු කෙරිණි.

ශ්‍රී ලංකාවට දකුණු දෙසින් දෙවුන්දර තුඩුවේ සිට නාවික සැතපුම් 480 ක් පමණ (කිලෝ මීටර් 889 ක් පමණ) දුරින් වූ ගැඹුරු මුහුදේදී ආපදාවට ලක් වූ මෙරට බහුදින ධීවර යාත්‍රාවක සිටි ධීවරයින් හය දෙනෙකු (06) කොළඹ, සමුද්‍රීය සෙවීම් හා මුදවා ගැනීම් සම්බන්ධීකරණ මධ්‍යස්ථානයේ සම්බන්ධීකරණයෙන්, විදෙස් නෞකාවක් මඟින් අද දින (2024 මැයි 31) නිරුපද්‍රිතව මුදවා ගැනීමට කටයුතු කෙරිණි.

ශ්‍රී ලංකා නාවික හමුදාව, කල්පිටිය උච්චමුනෙයි මුහුදු ප්‍රදේශයේ 2024 මැයි මස 30 වන දින සිදුකල සෝදිසි මෙහෙයුමක් මඟින්, නීති විරෝධී ලෙස මෙරටට රැගෙන ඒම‍‍ට උත්සාහ කල බීඩි කොළ කිලෝග්‍රෑම් හයසිය දහ හතකට (617) අධික තොගයක් (තෙත බර සහිත) රැගත් ඩිංගි යාත්‍රාවක් (01) සමඟ සැකකරුවන් දෙදෙනෙකු (02) නාවික හමුදා භාරයට ගැනීමට කටයුතු කෙ‍රිණි.

අධික වර්ෂාව හේතුවෙන් ගාල්ල, බද්දේගම ප්‍රදේශයේ ගිං ග‍ඟ හරහා ඉදි කර ඇති දොඩම්ගොඩ පාලම තුළ සිරවූ අපද්‍රව්‍ය ඉවත් කිරීමේ මෙහෙයුමක්, නාවික හමුදාව විසින් 2024 මැයි මස 27 වන දින ක්‍රියාත්මක කෙරිණි.

දිවයිනට බලපා ඇති අයහපත් කාළගුණික තත්වය මත ඇද හැලෙන අධික වර්ෂාපතනය හමුවේ පුත්තලම,පෙරියකඩවල වැව පිටාර ගැලීමෙන් මුන්දලම ප්‍රදේශයේ ඇති වී ඇති සුළු ජල ගැලීම් තත්වය මත පීඩාවට පත් එකම පවුලේ සාමාජිකයන් තිදෙනෙකු (03) කඩිනමින් මුදවා ගැනීමට ශ්‍රී ලංකා නාවික හමුදාව විසින් අද දින (2024 මැයි 20) කටයුතු කෙරිණි.

ශ්‍රී ලංකා නාවික හමුදාව කිලිනොච්චිය, නගර්කෝවිල් සහ කුඩාරප්පු මුහුදු ප්‍රදේශයන්හි සහ ත්‍රිකුණාමලය අඩුක්කුපාඩු මුහුදු ප්‍රදේශයේ 2024 මැයි මස 17 වන දින සිදුකල මෙහෙයුම් මඟින් නීති විරෝධී ලෙස රාත්‍රී කිමිදුම් කටයුතු සිදුකල සහ තහනම් දැල් භාවිතයෙන් ධීවර කටයුතු සිදුකල පුද්ගලයින් විසි දෙදෙනෙකු (22) සමඟ ඩිංගි යාත්‍රා හතක් (07), මුහුදු කූඩැල්ලන් ගණනින් හාරසියයක (400) පමණ තොගයක් සහ තහනම් ධීවර ආම්පන්න නාවික හමුදා භාරයට ගැනීමට කටයුතු කෙරිණි.

කොළඹ සමුද්‍රීය මුදවාගැනීම් සම්බන්ධීකරණ මධ්‍යස්ථානයේ සම්බන්ධීකරණයෙන්, මඩකලපුව ප්‍රදීපාගාරයේ සිට නාවික සැතපුම් 42 ක් පමණ (කිලෝ මීටර් 77 ක් පමණ) දුරින්, ශ්‍රී ලංකාවට නැගෙනහිර දෙසින් වූ ගැඹුරු මුහුදේදී, ආපදාවට ලක් වූ අස්වර් (ASWAR) නමැති මෙරට බහුදින ධීවර යාත්‍රාවක සිටි ධීවරයින් මුදවාගැනීම සඳහා ශ්‍රී ලංකා නාවික හමුදාව, 2024 මැයි මස 17 වන දින සිදුකල විශේෂ සෙවීමේ හා මුදවා ගැනීමේ මෙහෙයුම මඟින්, ධීවරයින් තුන් දෙනෙකු (03) මුදවා ගත් අතර, ඉන් එක් ධීවරයෙකු (01) ශ්‍රී ලංකා වෙරළාරක්ෂක දෙපාර්තමේන්තුවට අයත් යාත්‍රාවක් මඟින් ත්‍රිකුණාමලය වරාය ‍වෙතත්, අනෙක් ධීවරයින් දෙදෙනා (02) ධීවර යාත්‍රාවක් මඟින් වාලච්චේන ධීවර වරාය වෙතත් 2024 මැයි මස 17 වන දින රැගෙන ඒමට කටයුතු කෙරිණි.