නීති විරෝධී ලෙස මෙරටට රැගෙන ආ බවට සැකකෙරෙන බීඩි කොළ කිලෝ ග්‍රෑම් 2,040 කට අධික තොගයක් පුත්තලම සහ නොරොච්චෝලේ ප්‍රදේශයේදී නාවික හමුදා භාරයට
ශ්‍රී ලංකා නාවික හමුදාව මඟින් පුත්තලම කලපුව, පාලවිය සහ නොරොච්චෝලේ මුහුදු ප්රදේශයේ 2024 සැප්තැම්බර් මස 22 සහ 23 යන දිනයන්හි සිදුකළ සෝදිසි මෙහෙයුම් මඟින්, නීති විරෝධී ලෙස මෙරටට රැගෙන ආ බවට සැකකෙරෙන බීඩි කොළ කිලෝග්‍රෑම් දෙදහස් හතලිහකට (2,040) අධික (තෙත බර සහිතව) තොගයක් සහ ලොරි රථයක් (01) නාවික හමුදා භාරයට ගැනීමට කටයුතු කෙරිණි.
ඒ අනුව, වයඹ නාවික විධානයේ ශ්‍රී ලංකා නාවික නෞකා විජය ආයතනය මඟින් 2024 ඔක්තෝබර් මස 22 වන දින පුත්තලම කලපුවේ සිදුකළ සෝදිසි මෙහෙයුමකදී, එම කලපුවේ පාවෙමින් තිබූ බීඩි කොළ කිලෝ ග්‍රෑම් 38 ක පමණ තොගයක් නාවික හමුදා භාරයට ගත් අතර, 2024 ඔක්තෝබර් මස 23 වන දින ශ්‍රී ලංකා නාවික නෞකා තම්බපණ්ණි ආයතනය විසින් පුත්තලම පාලවිය ප්රදේශයේ ලොරි රථයක (01) තිබූ, නීති විරෝධී ලෙස මෙරටට රැගෙන ආ බවට සැකකෙරෙන උර හැටක (60) අසුරන ලද බීඩි කොළ කිලෝ එක්දහස් පන්සිය තිස් හතරයි (1,534) ග්‍රෑම් නවසීයක (900) පමණ තොගයක් සමඟ එම ලොරි රථය (01) නාවික හමුදා භාරයට ගැනීමට කටයුතු කෙරිණි.
එමෙන්ම, බටහිර නාවික විධානයට අනුයුක්ත වේග ප්‍රහාරක මුර යාත්‍රාවක් මඟින් 2024 ඔක්තෝබර් මස 23 වන දින නොරෝච්චෝලේ ප්‍රදේශයට ඔබ්බෙන් වූ මුහුදු ප්රදේශයේ සිදුකළ සෝදිසි මෙහෙයුමකදී එම මුහුදේ පාවෙමින් තිබූ උර දහතුනක (13) අසුරන ලද බීඩී කොළ කිලෝ හාරසිය හැට හතයි (467) ග්‍රෑම් හැත්තෑවක (70) ක පමණ තොගයක් වශයෙන්, බීඩි කොළ කිලෝග්‍රෑම් දෙදහස් හතලිහකට (2,040) අධික (තෙත බර සහිතව) තොගයක් මෙලෙස නාවික හමුදා භාරයට ගැනීමට කටයුතු කෙරිණි.
තවද, මෙම මෙහෙයුම් මඟින් පුත්තලම කලපුවේදී සහ පාලවිය ප්‍රදේශයේදී නාවික හමුදා භාරයට ගත් බීඩි කොළ තොගය සහ ලොරි රථය ඉදිරි නීතිමය කටයුතු සඳහා පුත්තලම සුරාබදු දෙපාර්තමේන්තු කාර්යාලය වෙතත්, නොරොච්චෝලේ මුහුදු ප්‍රදේශයේදී නාවික හමුදා භාරයට ගත් බීඩි කොළ තොගය ඉදිරි නීතිමය කටයුතු සඳහා කොළඹ වරාය රේගු නිවාරණ කාර්යාලය වෙතත් භාරදීමට කටයුතු කෙරිණි.
