වත්තල පුබුදුගම වගුරුබිම ආශ්‍රිත ප්‍රදේශයේ ඇති වූ හදිසි ගින්නක් නිවා දැමීම සඳහා නාවික හමුදා සහාය
වත්තල පුබුදුගම වගුරුබිම ආශ්‍රිත කැළෑ ප්‍රදේශයේ හදිසියේ හටගත් ගින්නක් මැඩපැවැත්වීම සඳහා සහය ඉල්ලා අද (2022 අගෝස්තු 26) දින ගම්පහ දිස්ත්‍රික් ආපදා කළමණාකරණ සම්බන්ධීකරණ ඒකකය විසින් සිදුකළ දැනුම් දීමකට වහාම ක්‍රියාත්මක වු නාවික හමුදාව එම ස්ථානය වෙත කඩිනමින් ගිනි නිවීමේ කණ්ඩායම් තුනක් (03) යොමු කර ගින්න නිවා දැමීම සඳහා සහය ලබා දෙන ලදී.
ඒ අනුව, බටහිර නාවික විධානය මඟින් ගිනි නිවීමේ රථ 02 ක් සහ ජල බවුසර් 03 ක් සමඟ ශ්‍රි ලංකා නාවික නෞකා ගැමුණු, රංගල සහ කැළණි ආයතනයන් ගෙන් ගිනි නිවීමේ කණ්ඩායම් 03 ක් මේ සඳහා අනුයුක්ත කෙ‍රිණි.
තවද, මෙම ගින්න මැඩපැවැත්වීම සඳහා අනුයුක්තව සිටි අනෙකුත් පාර්ශවයන් හා එක්ව නාවික හමුදා කණ්ඩායම් මහත් පරිශ්‍රමයක් දරමින් මෙම වගුරුබිම ආශ්‍රිත කැළෑ ප්‍රදේශයේ පැතිරෙමින් තිබූ ගින්න නිවා දැමීම‍ට කටයුතු කරන ලදී.
