ලෝක සාගර දිනයට සමගාමීව නාවික හමුදාව මඟින් කඩොලාන පැළ රෝපණය කිරීමේ වැඩසටහනක් ක්‍රියාවට නන්වයි
ජුනි මස 08 වන දිනට යෙදුණු ‘වෙනස්වන පෘථිවි සාගරය’ යන තේමාව රැගත් ලෝක සාගර දිනයට සමගාමීව කඩොලාන පැළ රෝපණය කිරීමේ වැඩසටහනක් 2023 ජුනි මස 08 වන දින ගිණිකොන නාවික විධානයේ නියෝජ්‍ය ආඥාපති කොමදෝරු රුවන් රූපසේන ගේ ප්‍රධානත්වයෙන් පානම කලපු ප්‍රදේශයේදී පැවැත්වීමට නාවික හමුදාව විසින් කටයුතු කෙරිණි.
නාවික හමුදාධිපති වයිස් අද්මිරාල් ප්‍රියන්ත පෙරේරා ගේ උපදෙස් හා මඟ පෙන්වීම යටතේ ක්‍රියාත්මක වන නාවික හමුදා කඩොලාන සංරක්ෂණ ව්‍යාපෘතිය යටතේ සෑම නාවික විධානයක්ම ආවරණය වන පරිදි ගංඟා, මෝය හා කලපු ආවරණය වන පරිදි නාවික හමුදාව විසින් කඩොලාන රෝපණය කිරීම සිදුකරනු ලබයි. ඒ අනුව, ගිණිකොන නාවික විධානය මඟින් ලෝක සාගර දිනයට සමගාමීව මෙම කඩොලාන පැළ රෝපණය කිරීමේ වැඩසටහන පානම කලපු ප්‍රදේශය ආශ්‍රිතව සිදු කෙරිණි.
වෙරළාශ්‍රිත පරිසර පද්ධතියේ ජෛව විවිධත්වය සුරුකීම සඳහා කඩොලාන පරිසරය විශාල දායකත්වයක් දක්වයි. මත්ස්‍යයන් හට අභිජනන පරිසරයක් නිර්මාණය කරනු ලබන මෙම කඩොලාන පරිසරය තුළින් ධීවර ප්‍රජාවට ප්‍රතිලාභ රැසක් ගෙන දෙනු ලබන අතර, කාබන්ඩයොක්සයිඩ් ඇතුළු අනෙකුත් හරිතාගාර වායූන් අවශෝෂණය කර ගැනීම කඩොලාන ශාක මඟින් සිදුවන බැවින්, එම පරිසරය රැක ගැනීම හා ව්‍යාප්ත කිරීම දිගුකාලීන ගෝලීය උණුසුම පාලනය සඳහා විශාල දායකත්වයක් දක්වයි.
තවද, කඩොලාන පරිසරය මිනිස් ක්‍රියාකාරකම් හේතුවෙන් වෙරළාශ්‍රිත ප්‍රදේශ වෙතින් සාගරයට එක්වන අපද්‍රව්‍ය සීමා කිරීම, ස්වභාවික හේතූන් මත කලපු, ගංඟා, මෝය සහ ඉවුරු ආශ්‍රිත වෙරළ පරිසරය ඛාදනය වීම වැළැක්වීම සහ වාත්‍රාශය පිරිසිදු කිරීම වැනි ඉහළ පාරිසරික වටිනාකමක් ඇති පරිසර පද්ධතියක් බැවින්, එම පරිසරය අනාගතය වෙනුවෙන් රැක ගැනීම සඳහා නාවික හමුදාව මෙවැනි කඩොලාන රෝපණය කිරීමේ ව්‍යාපෘති අඛණ්ඩව සිදු කරනු ලබයි.
මෙම අවස්ථාව සඳහා ගිණිකොන නාවික විධානයට අයත් ජ්‍යේෂ්ඨ හා කණිෂ්ඨ නිලධාරීන් සහ නාවිකයන් පිරිසක් සහභාගී වී සිටියහ.
