கடற்படையின் 73 ஆவது ஆண்டு நிறைவை முன்னிட்டு கடற்படையினரின் ஒன்றுகூடல் வெகு விமரிசையாக நடைபெற்றது

இலங்கை கடற்படையின் பெருமைமிக்க 73வது ஆண்டு நிறைவைக் கொண்டாடும் வகையில், சமய மற்றும் கடற்படை மரபுகளுக்கு முன்னுரிமை அளித்து கடற்படையினர் பரந்த அளவிலான நிகழ்ச்சிகளை ஏற்பாடு செய்துள்ளனர். இந்த நிகழ்வுகளின் ஒரு பகுதியாக, கடற்படையினரின் ஒன்றுகூடல் இன்று (20 டிசம்பர் 2023) கடற்படைத் தளபதி வைஸ் அட்மிரல் பிரியந்த பெரேரா தலைமையில் Wave ‘N’ Lake கடற்படை மண்டபத்தில் வண்ணமயமான முறையில் இடம்பெற்றது.

"நீல அலையின் வசீகரம்" என்ற தொனிப்பொருளில் ஏற்பாடு செய்யப்பட்ட இந்த நட்புறவுக் கூட்டம் கடற்படையில் இருந்து ஓய்வுபெற்ற மூத்த கடற்படையினர் மற்றும் அனைத்து கடற்படைக் கட்டளைகளைப் பிரதிநிதித்துவப்படுத்தும் மூத்த மற்றும் இளைய கடற்படையினர்களின் சேவை மற்றும் அர்ப்பணிப்பைப் பாராட்டுவதற்காக நடைபெற்றது. ஓய்வுபெற்ற மற்றும் சேவையாற்றும் மூத்த மற்றும் இளைய கடற்படையினர் தங்களின் சேவை அனுபவங்கள் குறித்தும், ஓய்வுபெற்ற மூத்த மாலுமிகள் கடற்படை வாழ்க்கை மற்றும் ஓய்வுபெற்ற வாழ்க்கை அனுபவங்களைப் பகிர்ந்து கொள்வதற்கும் இந்த நட்புறவு சந்திப்பின் மூலம் ஒரு வாய்ப்பு கிடைத்துள்ளது.

கடற்படை கலாசார இசைக்குழு மற்றும் நடன திணைக்களத்தின் பாட்டு, இசை, நடனம் ஆகிய அம்சங்களுடன் வண்ணமயமாக அமைந்த இந்த நட்புறவு சந்திப்பின் போது, கடற்படை தளபதி, கடற்படை பிரதானி மற்றும் கடற்படை அதிகாரிகள் உட்பட சிரேஷ்ட அதிகாரிகள் சிநேகபூர்வ சந்திப்பில் கலந்துகொண்டனர். கடற்படை தினத்தை முன்னிட்டு கடற்படை பாரம்பரியத்தில் ஒன்றான பாரம்பரிய படாகானா உணவும் இங்கு பரிமாறப்பட்டது.

இங்கு உரையாற்றிய கடற்படைத் தளபதி, கடற்படையின் குறிப்பிடத்தக்க 73 ஆண்டுகால பாரம்பரியத்தை நிலைநிறுத்துவது மற்றும் அதன் தனித்துவமான பாத்திரங்களை வெற்றிகரமாக நிறைவேற்றுவதை உறுதிசெய்து, அதன் மூலம் நாட்டின் கடல்சார் அபிலாஷைகளுக்கு பங்களிப்பது அனைவரின் கூட்டுப் பொறுப்பாகும் என்று வலியுறுத்தினார். மேலும் கூடுதலாக, அதிகாரிகள், மூத்த மாலுமிகள் மற்றும் இளைய மாலுமிகள் மத்தியில் ஒரு வலுவான தொடர்பை வளர்ப்பதன் முக்கியத்துவத்தை அவர் அடிக்கோடிட்டுக் காட்டினார். இந்த வலுவான பிணைப்பைப் பேணுவது சவாலான காலகட்டங்களில் கடற்படைப் பணியாளர்கள் வெளிப்புற தாக்கங்களால் பாதிக்கப்படாமல் இருப்பதை உறுதிசெய்கிறது என்று அவர் கருத்து தெரிவித்தார். கடற்படையின் பணியை நிறைவேற்றுவதற்கான உறுதிப்பாட்டை வலுப்படுத்தும் வகையில், சவால்களை கூட்டாக எதிர்கொள்வதன் முக்கியத்துவத்தையும் கடற்படைத் தளபதி எடுத்துரைத்தார்.

மேலும், இந்நிகழ்வில் கடற்படைத் தலைமை அதிகாரி ரியர் அட்மிரல் ஜயந்த குலரத்ன மற்றும் கடற்படை முகாமைத்துவ சபையின் சிரேஷ்ட அதிகாரிகள், கடற்படைத் தலைமையகத்தின் சிரேஷ்ட அதிகாரிகள், மேற்கு கடற்படை கட்டளையின் மற்றும் தொண்டர் கடற்படையின் தளபதி ரியர் அட்மிரல் சமன் பெரேரா உட்பட ஏனைய கட்டளைத் தளபதிகள், கொடி அதிகாரிகள் மற்றும் அனைத்து மூத்த மற்றும் இளநிலை அதிகாரிகள், ஓய்வு பெற்ற மூத்த மாலுமிகள், இளைய மற்றும் பெண் மாலுமிகள் கலந்து கொண்டனர்.