සුහදතාවය වර්ධනය කර ගැනීම සහ සේවා ලබා ගැනීම සඳහා ජපන් නාවික හමුදාවට අයත් “ඉකසුචි” සහ “මුරසමෙ” යන නෞකා දෙක අද දින (07) කොළඹ වරායට සේන්දු විය. ශ්‍රී ලංකා නාවික හමුදාව විසින් නාවික සම්ප්‍රදායන්ට අනුව මෙම නෞකාවන් පිළිගන්නා ලදී.

ශ්‍රී ලංකා වෙරළාරක්ෂක දෙපාර්තමේන්තුවේ නව අධ්‍යක්ෂ ජෙනරාල් වශයෙන් රියර් අද්මිරාල් සමන්ත විමලතුංග ජූලි මස 11 වන දින සිට පත් කර ඇති අතර, ඔහුගේ නව පත්වීමට අදාල ලිපිය නාවික හමුදාධිපති වයිස් අද්මිරාල් රවීන්ද්‍ර විජේගුණරත්න මහතා අතින් අද දින (06) නාවික හමුදා මූලස්ථානයේදී ලබාගත්තේය.

ශ්‍රී ලංකා නාවික හමුදාවේ අංක හතරකින් සමන්විත අභ්‍යන්තර දුරකථන අංකනය, අංක පහ දක්වා වෙනස් කොට ඇත. එම පරිවර්තනය අදියර දෙකකින් සිදුකරන ලද අතර, 2015 ජුලි මස 20 වන දින සිට ක්‍රියාවට නැංවුනු පළමු අදියරින් බටහිර, දකුණු සහ ගිනිකොනදිග නාවික විධානයන් ආවරණය කෙරුණු අතර, 2015 ජුලි මස 27 වන දින සිට ක්‍රියාවට නැංවුනු දෙවන අදියරින් නැගෙනහිර, උතුරු, උතුරු මැද සහ වයඹ නාවික විධානයන් ආවරණය කෙ‍රිණි.

කොළඹ තුරඟ තරග පිටියේ අද (අගෝස්තු 02) පැවති 2015 ඩයලොග් සත් සාමාජික අන්තර් සමාජ රගර් තරඟාවලියේ ˝බඳුන ශූරතාවය˝ දිනාගැනීමට නාවික හමුදා රග්බි ˝ඒ˝ කණ්ඩායමට හැකිවිය. නාවික හමුදා රග්බි ˝ඒ˝ කණ්ඩායම සහ යුද හමුදා ˝ඒ˝ කණ්ඩායම අතර පැවති තරඟයෙන් 29 ට 7ක් වශයෙන් ජයග්‍රහණය කිරීමට නාවික හමුදා රග්බි කණ්ඩායම මෙහිදී සමත්විය.

2006 වර්ෂයේදී සෙබළුන් රැගත් ජෙට්ලයිනර් නෞකාව ත්‍රීකුණාමලය වරායට ඇතුළු වීමේදී ත්‍රස්තවාදීන් විසින් එල්ල කරනු ලැබූ කාලතුවක්කු ප්‍රහාරයෙන් ජීවිතක්ෂයට පත්වූ නාවික හමුදා සාමාජිකයින් සිහි කිරීම 2015 අගෝස්තු මස 01 වන දින ත්‍රීකුණාමලය නාවික හා සාගරික විද්‍යාපීඨයේදී සිදු කෙරින.

කඳුරට වෙඩි තැබීමේ සංගමයට අයත් හන්තාන ‍වෙඩි පිටියේදී ජූලි මස 30 හා 31 යන දෙදින තුල පැවති වෙඩි තැබීමේ ශූරතා තරඟාවලියේ සමස්ථ ශූරතාවය දිනා ගැනීමට ශ්‍රී ලංකා නාවික හමුදා කාන්තා කණ්ඩායම සමත් විය.

“විරු සිසු ප්‍රදීප” ශිෂ්‍යත්ව පිරිනැමීමේ උත්සවය අතිගරු ජනාධිපති මෛත්‍රීපාල සිරිසේන මැතිතුමාගේ ප්‍රධානත්වයෙන් කොළඹ ආරක්ෂක සේවා විද්‍යාලයේදී 2015 ජූලි මස 30 වන දින පවත්වන ලදී.

උත්සව සමය වෙනුවෙන් පැමිණෙන බැතිමතුන්ගේ ආරක්ෂාව වෙනුවෙන් ඔකඳ සහ තලවිල යන ප්‍රදේශයන් හි නාවික හමුදා ක්ෂණික මුදවාගැනීමේ හා සහන බලඝනයේ ජීවිතාරක්ෂක කණ්ඩායම් කිහිපයක් යෙදවීමට නාවික හමුදාව කටයුතු කර ඇත.

ශ්‍රී ලංකා නාවික හමුදාවේ නියෝජ්‍ය මාණ්ඩලික ප්‍රධානී වශයෙන් රියර් අද්මිරාල් නීල් රොසයිරෝ, ආර්එස්පී, යූඑස්පී, එන්ඩීසී, පීඑස්සී, එම්එස්සී(ඩීඇන්ඩ්එස්එස්) ජූලි මස 11 වන දින සිට පත් කර ඇති අතර, ඔහුගේ නව පත්වීමට අදාල ලිපිය නාවික හමුදාධිපති වයිස් අද්මිරාල් රවීන්ද්‍ර විජේගුණරත්න මහතා අතින් අද (ජූලි 29) දින නාවික හමුදා මූලස්ථානයේදී ලබාගත්තේය.

ශ්‍රී ලංකා ඉරාන තානාපති කාර්යාලයේ ආරක්ෂක උපදේශක වශයෙන් කටයුතු කරන කර්නල් ඊබ්‍රහිම් රෝහනී මහතා අද දින (ජූලි 29) නාවික හමුදා මූලස්ථානයේදී නාවික හමුදාධිපති වයිස් අද්මිරාල් රවීන්ද්‍ර විජේගුණරත්න මහතා හමුවිය.