ශ්‍රී ලංකා වෙරළ ආරක්‍ෂක දෙපාර්තමේන්තුවේ පුහුණු කටයුතු සඳහා අවශ්‍ය යටිතල පහසුකම් පුළුල් කරමින්, එම දෙපාර්තමේන්තුවේ කිරින්ද උසස් පුහුණු මධ්‍යස්ථාන පරිශ්‍රයේ, ඇමෙරිකා එක්සත් ජනපදයේ අනුග්‍රාහකත්වයෙන් ස්ථාපිත කෙරුණු; යාත්‍රාවන් වෙත ප්‍රවිශ්ඨවීම, සෝදිසි කිරීම සහ අත්පත් කරගැනීමේ ක්‍රමවේදයන් සම්බන්ධ පුහුණුවීම් කටයුතු සඳහා භාවිතා කරනු ලබන Ship-in-a-Box පුහුණු සමාකෘතිය විවෘත කිරීම, ශ්‍රී ලංකාවේ ඇමෙරිකා එක්සත් ජනපද තානාපතිනී, ගරු ජූලි චංග් මැතිණියගේ ප්‍රධානත්වයෙන් සහ ශ්‍රී ලංකා වෙරළ ආරක්‍ෂක දෙපාර්තමේන්තුවේ අධ්‍යක්‍ෂ ජෙනරාල්, රියර් අද්මිරාල් පූජිත විතානගේ ගේ සහභාගිත්වයෙන් අද දින (2024 අගෝස්තු මස 15) කිරින්ද උසස් පුහුණු ආයතන පරිශ්‍රයේදී සිදු කෙරිණි.

රියර් අද්මිරාල් ජගත් කුමාර උතුරු මැද නාවික විධානයේ අභිනව ආඥාපති වශයෙන් අද දින (2024 අගෝස්තු 15) එම විධාන මූලස්ථානයේදී වැඩ භාර ගැනීමට කටයුතු කෙරිණි.

රාජකීය ඕස්ට්‍රේලියානු නාවික හමුදාවේ, ස්වෛරී දේශසීමා මෙහෙයුම් පිළිබඳ ඒකාබද්ධ කාර්ය සාධක බලකායේ අණදෙන නිලධාරී (Commander Joint Agency Task Force Operation Sovereign Borders) Rear Admiral Brett Sonter RAN සහ එම බලකායේ නියෝජිතයන් පිරිසක් අද දින (2024 අගෝස්තු 14) නාවික හමුදා මූලස්ථානයේදී නිල හමුවක් සඳහා නාවික හමුදාධිපති, වයිස් අද්මිරාල් ප්‍රියන්ත පෙරේරා හමුවිය.

මන්නාරම, තලෙයිමන්නාරම්තොට රජයේ දෙමළ මිශ්‍ර පාසලේ‍ ක්‍රීඩා පිටියෙහි අබලන් තත්වයට පත්ව තිබූ වේදිකාවක් නාවික හමුදා තාක්‍ෂණික හා ශිල්පීය දායකත්වයෙන් අලුත්වැඩියා කර සිසු අයිතියට පත් කිරීම, උතුරු මැද නාවික විධානයේ ආඥාපති රියර් අද්මිරාල් ඩේමියන් ප්‍රනාන්දු ගේ ප්‍රධානත්වයෙන් අද දින (2024 අගෝස්තු 12) සිදු කෙරිණි.

ශ්‍රී ලංකා නාවික හමුදාවේ සුනඛ සංචිතය වෙනුවෙන් (Military Working Dog Unit – MWD) බෙල්ජියම් මැලිනොයිස් වර්ගයේ සුනඛ පැටවුන් දෙදෙනෙක් (02) සහ උපකරණ පරිත්‍යාග කිරීම කපිතාන් එරල්ඩ් ධර්මරත්න (Master Mariner) විසින් 2024 අ‍ගෝස්තු මස 09 වන දින සිදු කෙරුණු අතර, එම පරිත්‍යාගය භාර ගැනීම වැඩ බලන ආඥාපති නාවික පාබල කොමදෝරු සනත් පිටිගල විසින් සිදු කෙරිණි.

නාවික හමුදා වැඩ බලන ධජ නිලධාරි නාවික දියත් විධානය, වශයෙන් කොමදෝරු සංජීව පෙරේරා අද දින (2024 අගෝස්තු 08) ත්‍රිකුණාමලය නාවික තඨාකාංගණයේ, ධජ නිලධාරි නාවික දියත් විධාන කාර්යාලයේදී වැඩ භාර ගැනීම සිදුකෙරිණි.

නාවික හමුදා පුද්ගලයින්ගේ සුභසාධන පහසුකම් පුළුල් කරමින්, ප්‍රථම සේවා වනිතා සිංගර් ප්‍රදර්ශනාගාරය විවෘත කිරීම අද දින (2024 අගෝස්තු 07) නාවික හමුදා සේවා වනිතා ඒකකයේ ගරු සභාපතිනී මාලා ළමාහේවා මැතිණියගේ ප්‍රධානත්වයෙන් වැලිසර නාවික සංකීර්ණයේදී සිදුකෙරිණි.

ඉන්දියාවේ නවදිල්ලි නුවර කොරියානු ජනරජ තානාපති කාර්යාලයේ නව ආරක්ෂක උපදේශක Lieutenant Colonel Han Jonghun අද දින (2024 අගෝස්තු 06) නාවික හමුදා මූලස්ථානයේදී නිල හමුවක් සඳහා නාවික හමුදාධිපති, වයිස් අද්මිරාල් ප්‍රියන්ත පෙරේරා හමුවිය.

කල්පිටිය, තලවිල ශාන්ත ආනා දේවස්ථානයේ වාර්ෂික දේව මංගල්‍යය, හලාවත රදගුරු ආර්. දොන් විමල් ශ්‍රී ජයසූරිය හිමිපාණන්ගේ ප්‍රධානත්වයෙන් සහ කිතුනු බැතිමතුන් විශාල පිරිසකගේ සහභාගීත්වයෙන් 2024 අගෝස්තු මස 04 වන දින කල්පිටිය, තලවිල ශාන්ත ආනා දේවස්ථානයේදී පැවැත්වුණු අතර, එය සාර්ථකව පැවැත්වීම සඳහා නාවික හමුදාවේ දායකත්වය ලබාදීමට කටයුතු කෙරිණි.

නිල සංචාරයක් සඳහා 2024 අගෝස්තු මස 02 වන දින දිවයිනට පැමිණි ඉන්දියානු නාවික හමුදාවට අයත් ‘INS Shalki’ සබ්මැරීනය, නිල සංචාරය සාර්ථකව අවසන් කරමින් අද දින (2024 අගෝස්තු 04) දිවයිනෙන් පිටත්වූ අතර, ශ්‍රී ලංකා නාවික හමුදාව විසින් එම සබ්මැරීනය වෙත නාවික හමුදා සම්ප්‍රදායානුකූලව සමුදීම, කොළඹ වරායේදී සිදු කෙරිණි.