නාවික හමුදාව මඟින් දෙස් විදෙස් සංචාරකයින්, පාසල් ළමුන්, නාවික හමුදා පුද්ගලයින් සහ ඔවුන්ගේ පවුල්වල සාමාජිකයින් හට ත්‍රීකුණාමලය වරාය ඇතුලත සහ නිලාවේලි පරෙවි දූපත නැරඹීමේ මුහුදු සංචාර යළි ඇරඹීමේ නියමු ව්‍යාපෘතිය 2023 අගෝස්තු මස 19 වන දින ත්‍රීකුණාමලය වරාය පරිශ්‍රයේ දී නිල වශයෙන් ආරම්භ කෙරිණි.

ශ්‍රී ලංකාවට අයත් සාගර කලාපයේ ආරක්‍ෂාව තහවුරු කරමින්, දේශයේ සමුද්‍රීය අභිලාෂය සාක්ෂාත් කරගැනීම සහ රජයේ සංවර්ධන වැඩපිළිවෙල වේගවත් කිරීම සඳහා ශ්‍රී ලංකා නාවික හමුදාව සිදුකරනු ලබන සුවිශේෂී කාර්යය භාරය වෙනුවෙන්, ශ්‍රී ලංකා ස්වේච්ඡා නාවික හමුදාව සිදුකරනු ලබන අඛණ්ඩ දායකත්වය ඇගයීම උදෙසා, ශ්‍රී ලංකා ප්‍රජාතාන්ත්‍රික සමාජවාදී ජනරජයේ ජනාධිපති හා සන්නද්ධ හමුදා සේනාධිනායක, ගරු රනිල් වික්‍රමසිංහ මැතිතුමා විසින් ශ්‍රී ලංකා ස්වේච්ඡා නාවික හමුදාව වෙත ජනාධිපති වර්ණ පිරිනැමීම 2023 අගෝස්තු මස 18 වන දින, බූස්ස ශ්‍රී ලංකා නාවික නෞකා නිපුන ආයතනයේ ප්‍රධාන සරඹ පිටියේදී හමුදා සම්ප්‍රදායන්ට අනුකූලව ඉතාමත් අභිමානවත්ව සිදුකෙරිණි.

කොළඹ රිජ්වේ ආර්යා ළමා රෝහලේ නේවාසිකව ප්‍රථිකාර ලබන රෝගී දරුවන්ගේ පහසුකම් පුළුල් කිරීම වෙනුවෙන් සමාජ සත්කාරයක් ලෙස එම රෝහලේ අබලන් වූ ඇඳන් ඇතුළු අනෙකුත් උපකරණ නාවික හමුදාවේ දායකත්වයෙන් අළුත්වැඩියාකර එම රෝහල වෙත භාරදීම අද දින (2023 අගෝස්තු 17) නාවික හමුදා නියෝජ්‍ය අධ්‍යක්‍ෂ නැව්බඳ ඉංජිනේරු කපිතාන් කපිල ද සිල්වාගේ සහභාගීත්වයෙන් සිදුකෙරිණි.

ඇමෙරිකා එක්සත් ජනපද ඉන්දු ශාන්තිකර විධානය (US Indo – Pacific Command - INDOPACOM), ශ්‍රී ලංකා නාවික හමුදාව සහ ශ්‍රී ලංකා වෙරළාරක්ෂක දෙපාර්තමේන්තුව එක්ව සංවිධානය කරනු ලද 12 වන ඉන්දු ශාන්තිකර පරිසර ආරක්ෂක සංසදය - 2023 කොළඹ ශැන්ග්‍රිලා හෝටලය කේන්ද්‍ර කර ගනිමින් 2023 අ‍ගෝස්තු මස 14 වන දින සිට දින 04 ක් පුරා පැවැත්වුනු අතර, ඉන්දු ශාන්තිකර කළාපීය පාර්ශවකරුවන් විසින් කලාපීය පරිසර ආරක්ෂාව සම්බන්ධයෙන් සිදුකරනු ලබන කාර්යභාරය පිළිබඳ උගත් පාඩම් සහ යහපත් භාවිතයන් පිළිබඳව සිදුකල ඉදිරිපත් කිරීම්, සැසි, සිද්ධි අධ්‍යයන සහ කණ්ඩායම් ක්‍රියාකාරකම් මඟින් සාර්ථකව දැනුම හා අත්දැකීම් හුවමාරු කර ගැනීමෙන් අනතුරුව, 2023 අගෝස්තු මස 17 වන දින ඉන්දු ශාන්තිකර පරිසර ආරක්ෂක සංසදය - 2023 නිමාවට පත්විය.

අකුරේගොඩ ත්‍රිවිධ හමුදා මූලස්ථාන පරිශ්‍රයේ ඉදිකිරීමට නියමිත සේවා මුක්ත භට සංගමයේ මූලස්ථාන ගොඩනැගිල්ල සඳහා මුල්ගල තැබීම අද දින (2023 අගෝස්තු 17) ආරක්‍ෂක අමාත්‍යංශයේ ලේකම්, ජෙනරාල් කමල් ගුණරත්න (විශ්‍රාමික) ගේ ප්‍රධානත්වයෙන් සිදුකෙරුණු අතර, එම අවස්ථාව සඳහා නාවික හමුදාධිපති, වයිස් අද්මිරාල් ප්‍රියන්ත පෙරේරා සහභාගී විය.

ඇමෙරිකා එක්සත් ජනපද ඉන්දු ශාන්තිකර විධානය (US Indo – Pacific Command - INDOPACOM), ශ්‍රී ලංකා නාවික හමුදාව සහ ශ්‍රී ලංකා වෙරළාරක්ෂක දෙපාර්තමේන්තුව එක්ව සංවිධානය කරනු ලබන 12 වන ඉන්දු ශාන්තිකර පරිසර ආරක්ෂක සංසදය - 2023 මේ වන විට කොළඹ ශැන්ග්‍රිලා හෝට‍ලයේදී සාර්ථකව පැවැත්වෙන අතර, එහි තෙවන දිනය වූ 2023 අගෝස්තු මස 16 වන දින නාගරීකරණයේ බලපෑම සහ ඉඩම් ආරක්ෂාව (Impacts of Urbanization and Land Security) පිළිබඳ උගත් පාඩම් සහ යහපත් භාවිතයන් පිළිබඳව ඉදිරිපත් කිරීම්, සැසි, සිද්ධි අධ්‍යයන, කණ්ඩායම් ක්‍රියාකාරකම් සහ කොරල් නැවත වගාව හා කඩොලාන වගාව සම්බන්ධ ප්‍රායෝගික වැඩමුළු මඟින් දැනුම හා අත්දැකීම් හුවමාරු කර ගැනීමට කටයුතු කෙරිණි.

කොමදෝරු ජගත් ලියනගමගේ ශ්‍රී ලංකා නාවික හමුදාවේ වැඩ බලන අධ්‍යක්‍ෂ ජෙනරාල් අයවැය හා මුදල් වශයෙන් අද දින (2023 අගෝස්තු 15) නාවික හමුදා මූලස්ථානයේ අධ්‍යක්‍ෂ ජෙනරාල් අයවැය හා මුදල් කාර්යාලයේදී වැඩ භාර ගන්නා ලදී.

ශ්‍රී ලංකා නාවික හමුදාවේ තාක්ෂණික හා ශිල්පීය දායකත්වයෙන් සහ කොළඹ රාජකීය විද්‍යාලයීය ඇමෙරිකා එක්සත් ජනපද නැගෙනහිර වෙරළ ආදී ශිෂ්‍ය පදනමේ හා ඇමෙරිකා එක්සත් ජනපදයේ වෛද්‍ය ජේඅයිටී රාජයියා (Dr. JIT Rajiyah) මහතාගේ මූල්‍ය අනුග්‍රහය යට‍තේ යාපනය, කයිට්ස් දූපතේ චෙට්ටිපුලම් දමිළ ප්‍රාථමික විද්‍යාලයේ අළුත්වැඩියා කරන ලද පන්ති කාමර ගොඩනැගිල්ල සහ සංවර්ධනය කරන ලද අනෙකුත් පහසුකම් සිසු අයිතියට පත් කිරීම 2023 අගෝස්තු මස 14 වන දින උතුරු නාවික විධානයේ ආඥාපති රියර් අද්මිරාල් අරුණ තෙන්නකෝන් ගේ ප්‍රධානත්වයෙන් සිදු කෙරිණි.

ශ්‍රී ලංකා නාවික හමුදාවේ වසර 33 කට අධික සේවා කාලයක් නිම කරමින් රියර් අද්මිරාල් රජින්ද සේරම් අද දින (2023 අගෝස්තු 15) නාවික හමුදා සේවයෙන් විශ්‍රාම යන ලදී.

ඇමෙරිකා එක්සත් ජනපද ඉන්දු ශාන්තිකර විධානය (US Indo – Pacific Command - INDOPACOM), ශ්‍රී ලංකා නාවික හමුදාව සහ ශ්‍රී ලංකා වෙරළාරක්ෂක දෙපාර්තමේන්තුව එක්ව සංවිධානය කරනු ලබන ඉන්දු ශාන්තිකර පරිසර ආරක්ෂක සංසදය - 2023 (Indo-Pacific Environmental Security Forum-IPESF) කොළඹ ශැන්ග්‍රිලා හෝටලයේදී, අද දින (2023 අගෝස්තු 14) ආරම්භ වූ අතර, එහි සමාරම්භක උත්සවය ශ්‍රී ලංකාවේ ඇමෙරිකා එක්සත් ජනපද තානාපතිනී ගරු ජුලී චන්ග් මහත්මිය, දේශගුණික විපර්යාස පිළබඳ ජනාධිපති ජ්‍යේෂ්ඨ උපදේශක රුවන් විජේවර්ධන මහතා, ආරක්ෂක මාණ්ඩලික ප්‍රධානී, ජෙනරාල් ශවේන්ද්‍ර සිල්වා, නාවික හමුදාධිපති වයිස් අද්මිරාල් ප්‍රියන්ත පෙරේරා ඇතුළු සම්භාවනීය ආරාධිතයන්ගේ සහභාගීත්වයෙන් සිදුකෙරිණි.