ලොව විශේෂ හමුදා වෙනුවෙන් පැවැත්වෙන ඇමෙරිකා එක්සත් ජනපද නාවික හමුදාවේ නාවික විශේෂ සංග්‍රාමික මූලික පුහුණු විධාන‍ය (US Navy, Naval Special Warfare Basic Training Command) මඟින් පවත්වනු ලබන අති දුෂ්කර මූලික සීල් පුහුණුව සාර්ථකව සම්පූර්ණ කළ ප්‍රථම ශ්‍රී ලාංකිකයා ලෙස සීල් පලඳනාව (SEAL Trident pin) හිමිකරගත් ලුතිනන් කොයාන් චාමිත, අද (2025 අගෝස්තු 05) නාවික හමුදා මුලස්ථානයේදී, නාවික හමුදාධිපති වයිස් අද්මිරාල් කාන්චන බානගොඩ හමු විය. එහිදී, සීල් පුහුණුව සාර්ථකව සම්පූර්ණ කර, ශ්‍රී ලංකා නාවික හමුදාව වෙත සහ මව්බිම වෙත විශාල කීර්තියක් සහ අභිමානයක් ගෙන දෙමින් සමස්ත ශ්‍රී ලාංකීය තරුණ ප්‍රජාවට ලබාදුන් වටිනා ආදර්ශය ඇගයූ නාවික හමුදාධිපති ඔහු වෙත සුභාසිංශන පිරිනැමීම සිදුකෙරිණි.