නාවික හමුදා සමාජීය මෙහෙවර ව්‍යාපෘතිය මඟින් අනුරාධපුර දිස්ත්‍රික්කය තුළ ස්ථාපනය කළ ප්‍රති ආශ්‍රැතිකරන ජල පිරිපහදු මධ්‍යස්ථාන 08 ක් ජනතා අයිතියට
ජනාධිපති ලේකම් කාර්යාලයේ මූල්‍ය ප්‍රතිපාදන මත, නාවික හමුදා පර්යේෂණ හා සංවර්ධන ඒකකය සහ නාවික හමුදා සමාජීය මෙහෙවර ව්‍යාපෘතිය මඟින් නිපදවන ලද ප්‍රති ආශ්‍රැතිකරන ජල පිරිපහදු යන්ත්‍ර 31 ක් අනුරාධපුර දිස්ත්‍රික්කයේ ස්ථාන 31 ක ස්ථාපනය කිරීමේ විශේෂ ව්‍යාපෘතිය යටතේ, තිරප්පනේ ප්‍රාදේශිය ලේකම් කොට්ඨාශයේ මහකණුමුල්ල ප්‍රජා ශාලා භූමියේ, කහටගස්දිගිලිය ප්‍රාදේශිය ලේකම් කොට්ඨාශයේ 231 නැගෙනහිර ග්‍රාමයේ සහ මොරගහවෙල කටුකැලියාව ග්‍රාමයේ යන ස්ථානයන්හි ස්ථාපනය කරන ලද ජල පිරිපහදු මධ්‍යස්ථාන තුනක් (03) ජනතා අයිතියට පත් කිරීම, 2024 දෙසැම්බර් මස 12 වැනි දින සිදු කෙරිණි.
තවද, ප්‍රති ආශ්‍රැතිකරන ජල පිරිපහදු යන්ත්‍ර 31 ක් අනුරාධපුර දිස්ත්‍රික්කයේ ස්ථාන 31 ක ස්ථාපනය කිරීමේ විශේෂ ව්‍යාපෘතියේ සමාප්තිය සනිටුහන් කරමින්, නොච්චියාගම ප්‍රාදේශිය ලේකම් කොට්ඨාශයේ මුදිතාගම ග්‍රාමයේ, පහළ මාරගහවැව බහුකාර්ය ගොඩනැගිල්ල භූමියේ, තිඹිරිවැව විල්පත්තුව විහාරස්ථාන භුමියේ, හොරුවිල ශ්‍රී තපෝදනාරාමය රජ මහා විහාරස්ථාන භූමියේ සහ අමුණුකොලේ සුහද අවමංගල්‍යාධාර සමිති ශාලා භූමියේ යන ස්ථානයන්හි ස්ථාපනය කරන ලද ජල පිරිපහදු මධ්‍යස්ථාන පහක් (05) ජනතා අයිතියට පත් කිරීම, 2024 දෙසැම්බර් මස 13 වැනි දින සිදු කෙරිණි.
ඒ අනුව, මෙම විශේෂ ව්‍යාපෘතිය යටතේ අනුරාධපුර දිස්ත්‍රික්කයේ ස්ථාන 31 ක ස්ථාපනය කරන ලද ජල පිරිපහදු මධ්‍යස්ථාන 31 ජනතා අයිතියට පත් කිරීමේ වැඩසටහන මෙලෙස සාර්ථකව නිමාවට පත් කෙරිණි.
