කඩොලාන පරිසර පද්ධතිය සුරක්‍ෂිත කිරීම සඳහා නාවික හමුදා දායකත්වය
සාගරික සහ ගොඩබිම් පරිසර පද්ධතීන් සුරැකීම සඳහා සුවිශේෂී දායකත්වයක් ලබා දෙනු ලබන ශ්‍රී ලංකා නාවික හමුදාව, කඩොලාන පරිසර පද්ධති ව්‍යාප්ත කිරීමේ වැඩසටහන යටතේ කඩොලාන පැල රෝපණය කිරීමේ වැඩසටහනක් ක්‍රියාත්මක කරන ලදී.
උතුරු නාවික විධානය කේන්ද්‍ර කරගනිමින් ක්‍රියාත්මක කල මෙම වැඩසටහන මගින් 2020 ජනවාරි 31 වන දින කඩොලාන පැල 2500 ක් රෝපණය කිරීමට නාවික හමුදාව කටයුතු කරන ලදි. ඒ අනුව නාවික හමුදා නියෝජ්‍ය මාණ්ඩලික ප්‍රධානී සහ උතුරු නාවික විධානය භාර ආඥාපති, රියර් අද්මිරාල් කපිල සමරවීර ගේ උපදෙස් මත උතුරු නාවික විධානයට අයත් ශ්‍රී ලංකා නාවික නෞකා එළාර, උත්තර සහ අග්බෝ යන ආයතන සමග එක්ව යාපනය, පොන්නා‍ලෙයි කළපු ප්‍රදේශයේ සිදු කළ මෙම වැඩසටහන සඳහා නාවික පුද්ගලයින් විශාල පිරිසක් සහභාගී වී සිටියහ.
තවද, කඩොලාන සංරක්ෂණ ව්‍යාපෘතියට අමතරව, ශ්‍රී ලංකා නාවික හමුදාව විසින් වෙරළ පිරිසිදු කිරීම, කැස්බෑ සංරක්ෂණය, කොරල්පර සංරක්ෂණ වැනි ව්‍යාපෘතීන් රැසක් ක්‍රියාත්මක කරගෙන යනු ලබයි. එමගින් ශ්‍රී ලංකාවේ සාගරික සහ ගොඩබිම් පරිසර පද්ධතීන් සුරැකීම සඳහා සුවිශේෂී දායකත්වයක් හිමිවන අතර, මෙම කර්තව්‍යයන්, වත්මන් නාවික හමුදාධිපති, වයිස් අද්මිරාල් පියල් ද සිල්වා ගේ සෘජු අධීක්‍ෂණය යටතේ ක්‍රියාත්මක කරනු ලබයි.
|
|
|
|
