දිවයින වටා වූ වෙරළ තීරය අපද්‍රව්‍ය වලින් තොර සුන්දර වෙරළක් බවට පත් කිරීමේ නාවික හමුදා දායකත්වය
අන්තර්ජාතික වෙරළ පිරිසිදු කිරීමේ දිනයට සමගාමීව නාවික හමුදාව විසින් ක්‍රියාත්මක කරගෙන යනු ලබන වෙරළ පිරිසිදු කිරීමේ වැඩසටහන් මාලාවේ තවත් වැඩසටහනක් ගිණිකොන නාවික විධානය කේන්ද්‍ර කරගනිමින් 2019 ඔක්තෝම්බර් 02 වන දින ක්‍රියාත්මක කරන ලදි.
ඒ අනුව, ගිණිකොන නාවික විධානය විසින් පානම වෙරළ තීරයේ පානම කලපුව සිට කිලෝ මීටර් 03 ක පමණ වෙරළ තීරයක් කේන්ද්‍ර කර ගනිමින් වෙරළ පිරිසිදු කිරිමේ වැඩසටහන ක්‍රියාත්මක කරන ලද අතර, මේ සඳහා පානම මහා විද්‍යාලයේ ගුරුවරුන් සහ සිසුන් පිරිසක්ද සහභාගි විය. එහිදී ස්වභාවික හේතූන් සහ මිනිස් ක්‍රියාකාරකම් හේතුවෙන් දැඩි ලෙස දූෂණයට ලක්ව තිබූ වෙරළ තීරය නාවික පුද්ගලයින්ගේ දැඩි කැපවීම මත අපද්‍රව්‍ය වලින් තොර වෙරළ තීරයක් බවට පත් කිරීමට හැකි වූ අතර, මෙම වැඩසටහන සඳහා නාවික හමුදා පුද්ගලයන් විශාල පිරිසක් සහභාගී වී සිටියහ.
නාවික හමුදාධිපති, වයිස් අද්මිරාල් පියල් ද සිල්වා ගේ උපදෙස් මත සියළු නාවික විධානයන් කේන්ද්‍ර කරගනිමින් දිවයින වටා වූ වෙරළ තීරය අලංකාරවත්ව සහ සුන්දර වෙරළ තීරයක් බවට පත් කිරීමට නාවික හමුදාව කටයුතු කර ඇති අතර, එමඟින් දිවයින වටා වූ සියළු වෙරළ තීරයන් දෙස් විදෙස් සංචාරකයින්ගේ ආකර්ශණය දිනා ගැනීමට සමත්ව ඇත.
|
|
|
|
