ශ්‍රී  ලංකා නාවික හමුදාවේ රාජකාරී නියුතු ජ්‍යෙෂ්ඨ නාවිකයින් 40 දෙනෙකු සඳහා රුපියල් ලක්ෂ පහක් (5) බැගින් වූ පොලි රහිත ණය මුදල් ලබා දීම අද (ජුලි 26) නාවික හමුදාධිපති, වයිස් අද්මිරාල් සිරිමෙවන් රණසිංහ මහතාගේ ප්‍රධානත්වයෙන් නාවික හමුදා මූලස්ථානයේදී සිදු කෙරුණි. ඒ සදහා රුපියල් මිලියන 20 ක මුදලක් නාවික සහන පදනම මගින් ලබාදෙන ලදි. මෙම අවස්ථාව සඳහා නාවික හමුදාධිපතිගේ ලේකම් කපිතාන් (සැ) අචල ද සිල්වා මහතා සහ නාවික සහන පදනමේ මුල්‍ය කළමණාකරු, ලුතිනන් කොමාණ්ඩර් කේඑම් දයානන්ද මහතා සහභාගී වි සිටියහ.

නාවික හමුදාවේ දිර්ඝ කාලයක් සේවය කර ඇති ජ්‍යෙෂ්ඨ නාවිකයින්ගේ සේවය අගය කරනු වස් මෙම පොලී රහිත ණය මුදල ප්‍රදානය කිරීම ආරම්භ කරන ලද අතර, මේ වන විට ජ්‍යෙෂ්ඨ නාවිකයින් 1453 දෙනෙකු සඳහා මෙම ණය මුදල ලබා දීමට නාවික හමුදා සහන පදනම කටයුතු කොට ඇත. එමෙන්ම, ඉදිරි කාල සීමාව තුළදී තවත් ජ්‍යෙෂ්ඨ නාවිකයන් 4035 දෙනෙකු සඳහා මෙම සහන ණය මුදල ලබා දීමට කටයුතු කරමින් පවතී.