ශ්‍රී ලංකා නාවික හමුදාව වෙත ඉඳුරාම බඳවා ගත් නිලධාරීන්/නිලධාරිණියන් 5 දෙනෙකු, 60 වන බදවා ගැනීමට අයත් ශිෂ්‍යභට නිලධාරීන් 39 දෙනෙකු සහ සේවා ප්‍රවේශ නිලධාරීන් 6 දෙනෙකු හට පත්වීමේ ලිපි ප්‍රදානය කිරීම අද (30) නාවික හමුදාධිපති, වයිස් අද්මිරාල් රවීන්ද්‍ර විජේගුණරත්න මහතාගේ ප්‍රධානත්වයෙන් කොළඹ, ශ්‍රී ලංකා නාවික නෞකා පරාක්‍රම ආයතනයේ අද්මිරාල් සෝමතිලක දිසානායක ශ්‍රවණාගාරයේදී සිදු කෙරිණි.

ඉඳුරාම බඳවා ගනු ලැබූ නිලධාරීන්, වෛද්‍ය, නැව් බඳ කාර්මික හා වාදක යන අංශයන්ට අයත් විය. මෙහිදී පත්වීම් ලැබූ ශිෂ්‍යභට නිලධාරීන් විධායක, සැපයුම්, ඉංජිනේරු, මැරීන් බලකා සහ විනයාරක්ෂක යන අංශයන්ගෙන් නාවික හමුදා සේවයට එක් විය. එමෙන්ම ශිල්පීය සහ වෛද්‍ය යන අංශවලට අයත් නාවිකයින් සේවා ප්‍රවේශ අපේක්ෂකයින් ලෙස පත්වීම් ලිපි ලදහ.

එහිදී අදහස් දැක්වූ නාවික හමුදාධිපතිතුමන්, ප්‍රථමයෙන් නව ශිෂ්‍යභට නිලධාරීන්හට සිය සුභාසිංශන එක් කළ අතර, නාවික හමුදා නිලධාරීයෙකු වශයෙන් ඉදිරියේදී තම මාතෘභූමියට ඉටුවිය යුතු යුතුකම් මැනවින් සිදු කිරීමටත් නාවික හමුදාවේ කීර්තිනාමය මෙන්ම අනන්‍යතාවය ආරක්ෂා වන අයුරින් ගෞරවාන්විත සේවයක් ඉටු කිරීමටත් අදිටන් කරගත යුතු බව ප්‍රකාශ කරන ලදී. එමෙන්ම, දූපත් රාජ්‍යයක් වන අපට සාගරය සහ සාගර සම්පත් ඉතාමත් වැදගත් බවත් ඒවා ආරක්ෂා කර ගැනීම සඳහා ශක්තිමත් නාවික හමුදාවක් තිබිය යුතු අතර ඒ සඳහා ඉදිරියේදී නාවික නිලධාරීන් වශයෙන් ඔවුන් හට විශාල වගකීමක් පැවරෙන බව ද එතුමා අවධාරණය කරන ලදී.

දශක 3 ක් පමණ පැවති ත්‍රස්තවාදය අවසන් කිරීමේ මෙහෙයුම් සඳහා දිවි හිමියෙන් කටයුතු කළ සියළුම රණවිරුවන්ගේ ජීවිත පරිත්‍යාගය අද අප ලබන නිදහසට හේතු වී ඇති බවත්, ඔවුන් එසේ ආරක්ෂා කර දුන් මාතෘ භූමිය ඉදිරියටත් ආරක්ෂා කිරීම සඳහා කටයුතු කිරීමට දායක වන ලෙසත් එතුමා වැඩිදුරටත් අදහස් දක්වමින් පැවසීය. විශේෂයෙන්ම හමුදා පුහුණුවක් ලැබීම පහසු කාර්යයක් නොවන බවද ඒ සඳහා කායික ශක්තියට වඩා මානසික ශක්තිය වැදගත් බවද නාවික හමුදාධිපතිතුමන් පෙන්වා දෙන ලදී. අවසාන වශයෙන් එතුමා, මාතෘ භූමියට සේවය කිරීම සඳහා සිය දරුවන් නාවික හමුදාවට භාර දීම සම්බන්ධයෙන් සමස්ථ නාවික හමුදාව වෙනුවෙන් ඔවුන්ගේ දෙමාපියන් වෙත සිය හෘදයාංගම ස්තුතිය පුද කිරීමට ද කටයුතු කරන ලදී.

නාවික හමුදා ප්‍රධාන ජල මානක නිලධාරී සහ අධ්‍යක්ෂ ජෙනරාල් පුද්ගල, රියර් අද්මිරාල් සිසිර ජයකොඩි මහතා, අධ්‍යක්ෂ ජෙනරාල් පුහුණු, රියර් අද්මිරාල් දිමුතු ගුණවර්ධන මහතා ඇතුළු ජ්‍යෙෂ්ඨ නාවික නිලධාරීන් පිරිසක් මෙන්ම ශිෂ්‍යභට නිලධාරීන්ගේ දෙමාපියන් ඇතුළු ඔවුන්ගේ පවුල්වල සාමාජික සාමාජිකාවන් රැසක් ද එම අවස්ථාව සඳහා සහභාගී වී සිටියහ.