ධීවර කටයුතු සඳහා තංගල්ල ධීවර වරායෙන් පිටත් වූ “ඉෂානි 1” නමැති බහු දින ධීවර යාත්‍රාව අද (21) උදෑසන වෙළඳ නෞකාවක ගැටී අනතුරකට පත්වී තිබූ අතර, එහි සිටි ලාංකික ධීවරයින් 6 දෙනෙකු නිරුපද්‍රිතව ගොඩබිම වෙත රැගෙන ඒමට නාවික හමුදාව සමත් විය. දකුණු නාවික විධානයට අනුයුක්ත P 422 වේග ප්‍රහාරක යාත්‍රාවේ රාජකාරී නියුතු නිලධාරීන් සහ නාවිකයන් විසින් දෙවුන්දර තුඩුවේ සිට මුහුදු සැතපුම් 9 ක් පමණ දුරකදී එම ධීවරයින් සහ ධීවර යාත්‍රාව බේරා ගෙන නැවත නිල්වැල්ල ධීවර වරාය වෙත රැගෙන ඒමට කටයුතු කර ඇත.