වයඹ නාවික විධානයට අයත් පුත්තලම හි පිහිටි, ශ්‍රී ලංකා නාවික නෞකා තම්බපන්නි ආයතනයට අනුයුක්ත නාවිකයන් පිරිසක් විසින් ඊයේ (11) ස්ථාන දෙකකදී කේරළ ගංජා අලෙවි කරමින් සිටි පුද්ගලයන් 3 දෙනෙකු අත්අඩංගුවට ගැනීමට සමත් විය. මේ සඳහා ‍පුත්තලම පොලීසියේ සහාය ද ලැබිණි.

ඒ අනුව, නවගත්තේගම ප්‍රදේශයේදී කේරළ ගංජා කිලෝග්‍රෑම් 3.5 ක් සමග පුද්ගලයෙකු සහ සීමාවලී ප්‍රදේශයේදී කේරළ ගංජා කිලෝග්‍රෑම් 1 ක් සමග පුද්ගලයන් දෙදෙනෙකු අත්අඩංගුවට පත් විය. එම පුද්ගලයන් සහ කේරළ ගංජා තොගය ඉදිරි නීතිමය කටයුතු සඳහා පිළිවෙලින් ආනමඩුව සහ පුත්තලම යන පොලීස් ස්ථාන වෙත භාර දීමට කටයුතු කරන ලදී.